sábado, 6 de octubre de 2012

MANTENZA ENTEIRA - CONTO


MANTENZA ENTEIRA
CONTO

    
     Encontráronse unha vez dous compadres e, antes de despedirse, un deles invitou ao outro con moita insistencia para que lle fora un día pola casa. Así llo prometeu o segundo compadre e, un día de inverno, apareceu pola súa casa. Mandouno pasar para a cociña, sentouno nun escano, fixo un bo lume diante del, puxéronse a falar de moitas cousas e, cando viu o compadre da casa que o lume quentaba ben, díxolle o outro:

     -Compadre, ¡esta é media mantenza!

     -Éa - contestou o segundo separando un pouco as pernas do lume.

     Seguiron falando un bo pedazo e o segundo compadre, vendo que non lle ofrecían a merenda e que xa logo era ben noite, despidiuse e marchouse para a casa pensando como cobrarlla ao compadre.

     Pasou algún tempo e un día volvéronse encontrar. O segundo compadre, disimulando como puido, púxose moi contento, e dixo:

     -Hom, xa tiña ben ganas de encontrarte ¡pois comprei, na feira pasada unha xuvenca moi bonita e quería eu que a vises! Mira, domingo pola tarde, espérote na casa.

     Quedou o primeiro compadre de lle ir ver a xuvenca e, efectivamente, o domingo foi á casa do compadre. Este ensinoulle a becerra e o demais gando e, despois, mandouno pasar para a cociña, sentouno nun banco e fíxolle un bo lume por diante e por tras. Cando os dous lumes estiveron ben encendidos dixo o da casa:

     -Compadre, ¡esta é a mantenza enteira!

     O outro compadre ben o comprendeu e, disimulando como puido, dixo que xa quentaba algo de máis, levantouse, mirou o reloxo e, facendo coma que lle era tarde, dixo:

     -¡Oe, non pensei que era tan tarde! Téñome que ir. Xa virei por aí outro día con máis calma.

     E agarrando o montante, saíu máis zurrado ca se lle puxeran lume no rabo.


XOAN ARCO DA VELLA

No hay comentarios:

Publicar un comentario

Está permitida la reproducción total o parcial de los trabajos y fotos de este blog.
Te agradecemos nos sugieras de sitios para trabajos nuevos.
Mis correos:
Apd. de Correos: 83 - 36900 - Marin - Pontevedra
xoanarcodavella@gmail.com
Telf - WhatsAp.: 600590901