O XENERAL AGUCES

O XENERAL AGUCES
CONTO

     

     Un soldado que viña de Cuba pasou por un lugar que lle quedaba no camiño da súa casa e pediu pousada a un home que xa estivera alá antes ca el.

     Nun descoido, o soldado, que era gatuñero do diaño, roubou un xamón que lle cadrou a xeito e meteuno nunhas alforxas que levaba. Despois puxéronse a falar da guerra de Cuba e a contar mentiras das valentías que fixeran por alá e o soldado, que era un bromista, díxolle ao amo da casa:

     -Logo, vostede debe acordarse de cando o xeneral Xamóns entrou na cidade de alforxas....

     -Non me acorda oír falar diso. Non estaría eu alí.

     -Si que estaba vostede presente, o que pasa é que era vostede quinto e non se apercibiu do feito.

     De alí a pouco marcharon á cama, e o amo da casa púxose a cavilar no que lle dixera o soldado e por máis voltas e voltas que lle daba á memoria non se acordaba de tal xeneral nin de tal cidade mais, pensa que te pensa, deuse conta de que lle fixera aquel galopín.

     Ergueuse da cama, sacou o xamón da alforxa e meteus dentro a pedra de aguzar.

     Para outro día á maña, cando se levantaron, díxolle o amo da casa ao soldado:

     -¡Ai, hom! Xa me acordo de todo o que contabas onte á noite. É verdade que eu era quinto cando o xeneral Xamóns entrou en Alforxas pero cando era veterano, saíu o xeneral Xamóns e entrou o xeneral Aguces.

     O soldado botou a alforxa ao lombo e ía asubiando de contento porque pesaba moito e pensaba que era o xamón.   Chegou a unha taberna e díxolle á taberneira:

     -¡Tráeme pan, viño e un coitelo ben grande!

     Coas mesma, partiu un cacho de pan, botou man ás alforxas, e sacou a pedra. Entón díxolle a taberneira:

     -E logo, ¿para que queres o coitelo?

     -Pois.... para aguzalo -respondeu o soldado todo cheo de razón.

XOAN ARCO DA VELLA

SÍGUENOS:

Facebook

XOAN ARCO DA VELLA  

O PARAISO EXISTE  

Twitter

XOAN ARCO DA VELLA

Pinterest

XOAN ARCO DA VELLA 

Google+

XOAN ARCO DA VELLA

Instagram

XOAN ARCO DA VELLA 

YouTube

XOAN ARCO DA VELLA