FERVENZA DA GRIFA - CRISTIMIL - LALÍN

FERVENZA DA GRIFA
REGO DAS LAXES
CRISTIMIL
LALÍN

    As fervenzas do Toxa en Pazos, Escuadro e Grava no municipio de Silleda, teñen replicas no municipio de Lalín. 

     Sen chegar ao tamaño das de Trasdeza nin en altura nin caudal, merecen ser coñecidas e postas en valor .

     Das fervenzas lalinenses a maior de todas elas quizais sexa a que atopamos no río da Laxe, que chimpa a súas augas en cascada enriba do Asneiro entre Bendoiro e Cristimil na paraxe coñecida polos veciños coma A Grifa.

     Temos localizadas outras fervenzas de menor tamaño en terras de Vilatuxe e Prado neste municipio de Lalín e algunhas mais  noutros da comarca as que en calquera intre  habemos dedicar unha reportaxe.

   Moi poucos coñecen a fermosa paraxe de ribeira onde se localiza esta fervenza da Grifa. Só algúns troiteiros arriscados se achegan alí na busca dos prezados peixes de río.

     Aquí chegamos nós vai para catro anos, seguindo o curso do Asneiro  na procura dos grandes muíños de Donsión, Bendoiro e Cristimil.  

     Repetimos diante desta fervenza aquela a sensación de cando chegamos  por primeira vez a fervenza do Toxa en Pazos nun lonxano día da primavera do 1972 .

     A agora famosa fervenza de Trasdeza ficaba alí dende sempre, pero esquecida e só algúns paisanos se achegaban moi de cando en cando a que hoxe é un dos recursos mais visitados da nosa comarca.

     Polo camiño de Santiago en Bendoiro e a lagoa de Sello.
  O regato da Laxe  que ten as súas fontes nas terras de Sello aló co nome de Rego dos Mosqueiros, forma naquela parroquia lalinense unha ampla lagoa nas antigas telleiras un paraxe que merecía unha posta en valor  movendo en tempos varios muíños de unha moa por Santiso e Bendoiro onde troca o nome polo da Laxe, lugar que atravesa as veces asolagando  a pontella e o vello camiño de peregrinación a Compostela.

     Entre prados e carballeiras  e por baixo das pontes e modernos viadutos da estrada  N-525, o  TAV e o do ferrocarril, vai facendo de lindeiro entre as parroquias de Bendoiro e Donsión para desembocar no rio Asneiro, chimpándose dende  uns 25 metros de altura para formar  unha  fermosa fervenza que ofrece a súa mellor versión cando as chuvias provocan enchentes. 

     Por se a estampa non xustificara a visita a esta paraxe de ribeira, pódese ollar  pouco abaixo o muíño de herdeiros dos de Cristimil, que milagrosamente perdura enmarcado entre a espesa vexetación que o fan case inaccesible, coa súa tosta que salvan as augas do Asneiro  que por aquí corren ceibes coma os nenos ao saír da escola buscando  fundise coas do Deza abaixo de Quintá en Cristimil.

   Para chegar a este entorno de ribeira compre tomar un camiño que arrinca abaixo do lugar de Cristimil e ofrece fermosas vistas das parroquias de Donsión e Bendoiro, que agora preside un enorme viaduto do tren de alta velocidade. 

     Supoñemos que en adiante comezará a coñecerse e mesmo ser visitada esta “Fervenza da Grifa”. Iso si,  case suplicamos que non se estrague o entorno con novas pistas, miradoiros e mesmo “grellas” para o churrasco, como xa se ten feito noutros fermosos recantos desta comarca de Deza.

     Meu agradecemento a o bo amigo Daniel González Alén, si a sua axuda non seria posible este traballo.
Daniel González Alén. (Faro de Vigo Nov. 2016)

VIDEO

VIDEO

MAPA

SÍGUENOS:

Facebook

XOAN ARCO DA VELLA  

O PARAISO EXISTE  

Twitter

XOAN ARCO DA VELLA

Pinterest

XOAN ARCO DA VELLA 

Google+

XOAN ARCO DA VELLA

Instagram

XOAN ARCO DA VELLA 

YouTube

XOAN ARCO DA VELLA

XOAN ARCO DA VELLA